Exodus 25
A Nihabi na Kape
(Nimariu 35:4-9)
1E BAKOVI DAGI i takia e Moses, 2“O taki e huriki a Israel ri gi bole a maka nihabi ri gi habi nau. A maki ri ngaru ni habi na hatene ria o bole. 3O bole ne ria a gol, a silva, a bras; 4a vuna sipsip ge gomagoma, ge vururu, ge kuakua; a kala kamumu ni rata na vuna meme, 5na kulina sipsip a toga ni kalu vururu; a kulina lui ▼ a bokona kai a akas; 6a namona oliv ne vona a lam; a havu ranga ni vuli turana a nibiri ne vona ni gamai; a havu ranga ne vona a havu mangisipa; 7a kedo oniks; a kedo parahidi ni gi kolo dili na bagetua na ngalana prister.8“O taki e huriki ri gi haea tara kape nau ga made turane ria. 9A maka mahalana kape ge manga a hini a taki polo vomu.
A Tava na Ngava Dagi
(Nimariu 37:1-9)
10“O taki e huriki ri gi ratea a Tava na Ngava Dagi na mavilana kai a akas. A niolana ge 110 sentimita, a nibolana ge 66 sentimita, a nipesina ge 66 sentimita. 11O bole a gol kabakaba, o kavitagu a hini pololilo a hini polovavo na tava, a harena a tava ranga o kavitagu na gol. 12O rata na gol a halui ge va o kolotata dili na vahana tava i va. O kolo na tabekena tava tara ge rua, na tabeke tara ge rua. 13O rata o naviri na gol a tabekena kai a akas ge rua, ge a binole. 14O rodo na halui ra binole nga; ge dili na tabeke koea tara, na tabeke lake tara, ne vona ni kaloho a tava. 15Ra binole nga, ru gu tabuli kunana na halui. Naha ni lalu tala. 16Muri ga habi vomu a tabekena kedo i rua ru tahoka a Ngava Dagi, o ru pololilo na tava.17 b“O ratea na gol kabakaba a matana tava. Ra matana tava iea a murina nidodo. A niolana ge 110 sentimita, a nibolana ge 66 sentimita. 18O bole a gol kabakaba o ubi, o rata a hanuna agelo ge rua. 19A agelo tara ge pesi na kanena tava, a agelo tara ge pesi na maurina tava. O rata na tabekena gol ge taku na matana tava a agelo nga. 20Ra agelo nga, ru gu vangalai, ru gu pesi langa na murina nidodo. A karapane rua, ru gu vulala tala ge kavitagua a matana tava. 21Ga habi vomu a tabekena kedo ge rua ru tahoka a Ngava Dagi ni here ne rua, o ru dili na tava o tukaria a matana. 22Iau ga made na tabeke ni puga vuroki a naro hale, na kurukuruna a agelo nga polomeli na matana Tava na Ngava Dagi o tagui iau vonga. Ga vakalongo ioe vona a maka vinara nau, muri o habi ne huriki a Israel ri gi ramai.
A Dede na Bret na Vure
(Nimariu 37:10-16)
23“O ratea na kai a akas a dede. A niolana ge 88 sentimita, a nibolana ge 44 sentimita, a nipesina ge 66 sentimita. 24O kavitagua na gol kabakaba, o ratea a gol ge ola o ru haluia na harena. 25A nigatukana gol ge 8 sentimita. A maka tabekena gol kiroko ni gi ru halui a harena dede. 26O rata na gol a halui ge va, ni gi kolotata dili na vahana nimodo na dede i va. 27Ra halui nga ge tabuli tabukoi na harena dede. 28O kau a tabekena kai a akas ge a binole na dede. 29O rata a maka pelete a tavila ne vona a havu mangisipa, a buroi a kikei ne vona ni guru dili a nihabi na naru. A maki nga mu rata na gol kabakaba. 30 cNa parava vakaroro, a maka bret mu habi nau, mu ru na dede ga matai.”A Butuna Lam
(Nimariu 37:10-16)
31E Bakovi Dagi i takia e Moses, “O bole a gol kabakaba o ratea a butu ne vona ni ru langa a maka lam vona. A butuna lam o rata maea, O ubi na ama a gol o rata a murina ni vakapesi a lam, a lebona lam, a bako, a hanuna keke. O rata na tabekena gol ge taku. 32Ra butu na lam ge tahoka a bakona ge polotara. Ge tolu na tabeke tara, ge tolu na tabeke tara. 33A bakona ge taku ge tahoka a hanuna keke ge tolu, ge manga a purana kai a almon. 34A butuna lam tara ge mavonga. Ge tahoka a hanuna keke ge va ge manga a purana kai a almon. 35O rata a hanuna pagana keke na taruna murina lam. A keke i taku ge tabuli na taruna murina lam i rua. 36O rata na tabekena gol kabakaba ge taku a bako, a maka hanuna keke.37“Muri o rata a lam ge polorua o ru na maka bako. O ru kamumu a lam ne ria, ri gi parai a hini pololilo na kape nau. 38O bole a gol kabakaba o rata a kaira ne vona ni nugu a kanono, a pelete ne vona habulo. 39O bole a gol kabakaba ge 35 kilo, o rata a butuna lam turana a maka mahalana. 40 dNa tahuna o rata a maki nga, o ramai kamumua a naro a vakasiri ioe vona na lolo.
Copyright information for
BNP